DINA DANGET IEU KEUR LUMANGSUNG KAJUARAAN SÉPAKBOLA ANTAR CLUB WALIKOTA SUKABUMI CUP II TAUN 2017

Penulis : SKPD Kota Sukabumi
 18 - 03 - 2017


Reporter : ENDANG SUMARDI

 

Dina danget ieu keur lumangsung Kajuaraan Sépakbola Antar Club Walikota Sukabumi Cup II Taun 2017, di Stadion Suryakencana Kota Sukabumi, dina raraga mapag sakaligus ngareuah-reuah tepung taun ka 103 Poé Jadi Kota Sukabumi, cindekna tanggal 1 April 2017 nu bakal datang. Ěta Kajuaraan Sépakbola téh, dibuka sacara resmi ku Walikota Sukabumi, H. Mohamad Muraz, S.H., M.M., cindekna tanggal 12 Maret 2017, di Stadion Suryakencana Kota Sukabumi, anu ditandaan ku ngaleupaskeun balon gas.

 

Hadir dina kasempetan éta, Ketua katut Anggota DPRD Kota Sukabumi, unsur Forkopimda (Forum Koordinasi Pimpinan Daérah) Kota Sukabumi, Wakil Kapala Setukpa Lemdiklat Polri Sukabumi, Ketua TP PKK Kota Sukabumi, Asistén Pamaréntahan Setda Kota Sukabumi, para Kapala SKPD (Satuan Kerja Parangkat Daérah), 2 urang béntang Persib Bandung, Atép jeung Tantan, sarta para tamu ondangan séjénna.

 

Dina biantarana, Walikota Sukabumi ngahaturkeun nuhun ka Ketua Paguyuban Sépakbola Kota Sukabumi salaku Ketua Panata Calagara, Ěnda Ruswénda katut ka sakumna réngrénganana, anu geus usaha satékah polah tatahar sacara optimal, anu pamustunganana ieu Kajuaraan Sépakbola téh bisa dilaksanakeun sacara hadé jeung lancar.

 

Saterusna, Walikota Sukabumi ngaharepkeun, ku dilaksanakeunana ieu Kajuaraan Sépakbola téh, bisa ngahudangkeun sumanget jeung gairah pasépakbolaan di Kota Sukabumi, sakaligus jadi motivasi pikeun sakumna klub sépakbola di Kota Sukabumi, pikeun salawasna ilubiung sacara aktif kana sagala rupa évent jeung kajuaraan sépakbola, sangkan bisa nyangking prestasi sakaligus nyeungitan ngaran Kota Sukabumi, hususna di Jawa Barat. Salian ti éta ogé diharepkeun, aya pausahaan jeung sponsor anu daék ngawaradagan pasépakbolaan di Kota Sukabumi.

 

Dina kasempetan éta, Walikota Sukabumi masrahkeun Layang Pangajén ka sala saurang legéndaris sépakbola Kota Sukabumi, Sugandi, anu geus nyeungitan ngaran Kota Sukabumi, boh di tingkat régional jeung nasional boh di tingkat internasional. Disagigireun ti éta, ogé dipasrahkeun Piala Bagilir Walikota Sukabumi, ti juara Walikota Sukabumi Cup I, nya éta Tovo FC, ka Walikota Sukabumi, anu saterusna dipasrahkeun deui ka Ketua Panata Calagara, pikeun diparebutkeun deui.

 

Salajuna Ketua Paguyuban Sépakbola Kota Sukabumi salaku Ketua Panata Calagara, Ěnda Ruswénda ngajelaskeun, ieu Kajuaraan Sépakbola Antar Club Walikota Sukabumi Cup II Taun 2017 téh, dijadwalkeun lumangsung nepi ka tanggal 1 April 2017 nu bakal datang, sarta diiluan ku 18 club sépakbola ti sababaraha daérah di Jawa Barat jeung Jakarta, pikeun marebutkeun hadiah anu gedéna ngahontal Rp. 45 juta.