MOU NGEUNAAN PANYALAGARAAN JEUNG PANGEMBANGAN PSDKU IPB DI KOTA SUKABUMI GEUS DITANDATANGAN

Penulis : SKPD Kota Sukabumi
 17 - 03 - 2017


Reporter : ENDANG SUMARDI

 

MoU (Mémorandum of Understanding) atawa Nota Kasaluyuan Gawé Bareng ngeunaan Panyalagaraan jeung Pangembangan PSDKU (Program Studi Di Luar Kampus Utama) IPB (Institut Pertanian Bogor) di Kota Sukabumi, geus ditandatangan sacara resmi ku Menristékdikti (Mentri Risét Téknologi jeung Pendidikan Tinggi) RI, Prof. H. Mohamad Nasir, Ph.D., Ak., Gubernur Jawa Barat, Dr. H. Ahmad Héryawan, Lc., M.Si., katut Walikota Sukabumi, H. Mohamad Muraz, S.H., M.M., cindekna tanggal 13 Maret 2017, di Kampus PSDKU Unpad (Univertias Padjadjaran) Pangandaran.

 

Hadir dina kasempetan éta, Menpora (Mentri Pamuda jeung Olahraga) RI, H. Imam Nahrawi, S.Ag., para pajabat di lingkungan Pamaréntah Propinsi Jawa Barat, Sekertaris Daérah Kota Sukabumi, Dr. H.M.N. Hanafie Zain, M.Si., Asistén Paékonomian jeung Pangwangunan Setda Kota Sukabumi, H. Dédén Soléhudin, S.Ag., M.M., para Kapala OPD (Organisasi Parangkat Daérah) di lingkungan Pamaréntah Kota Sukabumi, jeung para tamu ondangan séjénna.

 

Dina kasempetan éta, Menristekdikti RI, Prof. H. Mohamad Nasir, Ph.D., Ak. ngajelaskeun, APK (Angka Partisipasi Kasar) Paguron Luhur di Jawa Barat kawilang masih handap. Tah kulantaran kitu, Menristékdikti RI ngaharepkeun, ku ayana Kampus PSDKU Unpad di Pangandaran jeung Kampus PSDKU IPB di Kota Sukabumi, bisa jadi kampus anu gedé, anu pamustunganana bisa ngadongkrak APK Paguron Luhur di Jawa Barat,  sarta bisa ngadorong kana kamajuan jeung paningkatan ékonomi di daérah Jawa Barat.


Salajuna Gubernur Jawa Barat, Dr. H. Ahmad Héryawan, Lc., M.Si. ngaharepkeun, ku ayana Kampus PSDKU Unpad di Pangandaran jeung Kampus PSDKU IPB di Kota Sukabumi téh, bisa ngawangun sakaligus ngaronjatkeun kamajuan daérah Jawa Barat. Anapon waragad anu dikaluarkeun pikeun ngawangun Kampus PSDKU Unpad di Pangandaran jeung Kampus PSDKU IPB di Kota Sukabumi téh ngahontal Rp. 30 miliar.

 

Sedengkeun Walikota Sukabumi, H. Mohamad Muraz, S.H., M.M. ngajelaskeun, rupa-rupa usaha dina ngaronjatkeun ajén Paguron Luhur di Kota Sukabumi, salawasna dilaksanakeun ku Pamaréntah Kota Sukabumi, sok sanajan Pangalolaan Paguron Luhur téh ngarupakeun kawenangan Pamaréntah Puseur. Dina éta hal, Pamaréntah Kota Sukabumi jeung Pamaréntah Propinsi Jawa Barat, terus ngadorong panyalagaraan jeung pangembangan Kampus PSDKU IPB di Kota Sukabumi. Lantaran Pamaréntah Kota Sukabumi jeung Pamaréntah Propinsi Jawa Barat, ngabogaan filosofi anu sarua, nya éta hayang ngaronjatkeun ajén SDM (Sumber Daya Manusa), ku cara méré aksés anu mingkin deukeut ka warga masarakat Kota Sukabumi jeung di sabudeureunana.

 

Saterusna dijelaskeun, panyalagaraan kuliah munggaran PSDKU IPB di Kota Sukabumi geus dimimitian, cindekna dina taun 2016, sarta saméméh Kampus PSDKU IPB di Kota Sukabumi réngsé diwangun, pikeun saheulaanan ngagunakeun Kampus Politéknik Sukabumi. Salian ti éta, Pamaréntah Kota Sukabumi ogé geus nyiapkeun lahan legana 15 héktar, sarta dina taun 2017 ieu baris ditambahan jadi 20 héktar, pikeun Kampus PSDKU IPB di Kota Sukabumi jeung Kampus Politéknik Sukabumi, cindekna di wewengkon Kacamatan Cibeureum Kota Sukabumi, anu waragadna bantuan ti Pamaréntah Propinsi Jawa Barat.